Sportistes braziliane së Dinamos, Nayara Ferreira i është kërkuar të vërtetojë gjininë e saj femërore nëpërmjet analizës së gjakut. Kaq ka mjaftuar që ajo përveçse të izolohet në shtëpi prej më shumë se një jave, të pësojë një shok psikologjik që na u desh shumë kohë për ta vënë nën kontroll, që ajo të bënte këtë rrëfim ekskluziv për gazetarin e Top Channel, Endi Tufa, intervistë e cila u transmetua në Top Story.
Intervista e plotë:
Gazetari: Po thua se nuk je në një situatë shumë normale. Mund të na tregosh më shumë rreth kësaj?
Nayara Ferreira: Do të flas portugalisht, sepse është më e lehtë për mua të shpreh atë që ndiej dhe gjithçka që po ndodh. Kjo është një situatë shumë e vështirë për mua. Është hera e parë që përjetoj diçka të tillë në gjithë karrierën time. Luaj volejboll që nga mosha 12-vjeçare.
Gazetari: Ti je e fortë.
Nayara Ferreira: Jam larg familjes. Mendoj se të gjitha volejbollistet do ta kuptojnë atë që do të them tani. Jam larg familjes dhe më duhet ta përballoj këtë situatë e vetme, pa përkrahjen e tyre, pa i pasur pranë njerëzit që dua. Është shumë e vështirë për mua ta përjetoj gjithë këtë. Ashtu siç edhe ti e the, jeta ime është private. Jam nga ato persona që i bëjnë gjërat offline, pra, i mbaj gjërat për vete. Ajo që po ndodh tani me mua është diskriminim. Nuk e pranoj këtë. Nuk më kanë kthyer përgjigje dhe nuk më kanë dhënë asnjë arsye ligjore pse e bënë këtë. Ata thjesht e bënë. Kur pyeta një zyrtar të federatës – nuk e di as kush ishte – më tha se “është dokument privat dhe nuk mund të ta tregoj”. I thashë: “Ah, qenka private? Çfarë është private për ty në lidhje me jetën time? Pse?” Kështu ndihem unë tani. Nuk kam fjalë ta përshkruaj. Kam luajtur në shumë shtete dhe nuk e di me sa volejbolliste kam luajtur në këtë botë. Tani ndihem e shkatërruar. Kjo ishte ajo që doja të thosha.
Gazetari: Ti je e fortë dhe mund të kthehesh edhe më e fortë.
Nayara Ferreira: Epo, të shohim se çfarë do të ndodhë me jetën time, sepse tani jam në mes të kësaj situate.
Gazetari: Po ti mund të fitosh gjyqin.
Nayara Ferreira: Jam 100% femër, dhe kjo është diçka që nuk kam pse ta shpjegoj. Nuk është e nevojshme t’ju them se jam femër, që kam lindur femër. Ju vetëm keni vënë re si vishem, sa të gjatë i kam flokët, fizikun tim, nëse kam muskuj apo tatuazhe. Vetëm kaq. Ajo që keni bërë është diskriminim. Dhe mendoj se kush diskriminon dikë, e ka të vështirë të flejë i qetë. Kjo është çnjerëzore dhe e papranueshme. Nuk e di si mund të flejë presidenti juaj i federatës në një situatë të tillë. Si mund të flejë ai me këtë në ndërgjegje? Kjo është pyetja ime.
Gazetari: Nuk ke mundur të flesh?
Nayara Ferreira: Nuk kam fjetur, nuk kam ngrënë, nuk kam pirë as ujë. Kështu është jeta ime tani. Prandaj, faleminderit Federatës Shqiptare që ma bëtë këtë. Shumë faleminderit!
Gazetari: Ka njerëz që e mbështesin publikisht opinionin tënd.
Nayara Ferreira: Po, kam disa njerëz pranë që më mbështesin dhe që besojnë se e vërteta është në anën time.
Gazetari: E di që mendimi dhe opinioni publik janë me ty? Duhet ta dish këtë.
Nayara Ferreira: E di shumë mirë, por nuk është e lehtë. E vërteta do të dalë në dritë dhe unë nuk i druhem kësaj. Nuk kam frikë. Kjo ishte ajo që doja të thosha dhe kaq.