Juve-Lazio ka duel portierësh, Strakosha sfidon Buffon, talenti përballë eksperiencës

I kanë mjaftuar vetëm pak muaj për të fituar jo vetëm besimin e trajnerit Simone Inzaghi, por edhe vëmendjen e kritikëve të futbollit italian.

Në prag të ndeshjes Juventus-Lazio, Thoma Strakosha vlerësohet si ana tjetër e peshores ku qëndron edhe kolegu i tij, Gianluiggi Buffon.

Të dy titullarë në skuadrat respektove, pasi Strakosha ka arritur të mposhtë më në fund ish-numrin 1, Federico Marchetti, ndërsa këtë sezon, paraqitjet e Buffon kanë ngritur pikëpyetjet e para rreth formës së kapitenit të Italisë.

Në “Juventus Stadium” do të jetë edhe përballja personale e tyre, sepse duelin e parë sezonal arriti ta fitonte pikërisht talenti shqiptar në Superkupën e Italisë ku shpëtoi Lazion me disa pritje spektakolare.

Sipas mediave të vendit fqinj, Strakosha ajo vetëm që i ka plotësuar pritshmëritë, por i ka tejkaluar ato, sepse në 10 ndeshje si titullar ka pësuar 13 gola, por numri mund të ishte më i madh duke parë rastet e rrezikshme të kundërshtarëve që ka arritur të evitojë.

Përveç pritjeve të pabesueshme në Superkupë, Strakosha është bërë protagonist edhe në ndeshjet kundër Veronas e Genoas. Një portier që po tregon një pjekuri dhe siguri të pazakontë për moshën e tij dhe përballë idhullit Buffon prezantohet në momentin më të mirë të karrierës.

Në Torino, të shtunën në orën 18:00, Strakosha do të zbresë në fushë që nga minuta e parë për të sfiduar sërish italianin e portës bardhezi, në një duel që pritet të konfirmojë sërish se Strakosha është në rrugën e duhur për të ndjekur gjurmët e legjendës italiane të cilin do të ketë mundësi ta ndjekë nga afër për 90 minuta të zjarrta.