Kapitenët e Superiores zbresin në fushë, ja mesazhi që lexuan sot për bojkotin

Kapitenët e skuadrave të Kategorisë Superiore ashtu si një javë më parë kanë zbritur në fushën e lojës, por jo për të luajtur. Ata kanë ripërsëritur një mesazh para çdo ndeshje, që do të përkonte me javën e tretë, duke i bërë thirrje qeverisë për plotësimin e 3 kërkesave.

“Ne, futbollistet e skuadrave të Kategorisë Superiore vazhdojmë protestën tonë në mbështetje të katër kërkesave të Ligës Profesioniste të Futbollit, drejtuar qeverisë shqiptare.

Së bashku me ne, në këtë protestë, sot janë bashkuar edhe futbollistët e rinj të akademive, që janë e ardhmja e futbollit. Të gjithë së bashku duam që zëri ynë të dëgjohet për të siguruar një të ardhme sa më të mirë për lojën tonë të dashur, futbollin.

Ne jemi të bindur që kërkesat drejtuar qeverisë janë rruga e shpëtimit për futbollin dhe sportin në përgjithësi. Vetëm kështu mund të shpresojmë në një të ardhme më të mirë.

Ne do të vazhdojmë të ngremë zërin, sepse besojmë se sporti është lënë në harresë ndër vite. Dhe si një e mirë publike, të gjithë politikanët duhet t’i kthejnë sytë nga sporti. Presim sa më shpejt një reagim pozitiv nga ana e qeverisë për të ardhmen e sportit në Shqipëri”, mbyllet deklarata e përbashkët e kapitenëve të ekipeve të Superiores.