Laçi triumfon pastër në duelin e ndezur ndaj Vllaznisë në shtëpi

Laçi ka marrë një fitore të rëndësishme ndaj Vllaznisë, duke triumfuar 2-0 në sfidën e javës së katërt të Abissnet Superiores. Një ndeshje që nisi e qetë, por që në pjesën e dytë u shndërrua në një përballje me tension dhe episode të shumta.

45 minutat e para u mbyllën pa gola dhe me pak raste të rrezikshme. Momenti më i nxehtë erdhi në minutën e 33-të, kur një përplasje në fushë përfshiu edhe pankinat e dy skuadrave. Arbitri Kreshnik Cjapi ndëshkoi me karton të verdhë Nergutinin e Laçit dhe Muratajn e Vllaznisë.

Në pjesën e dytë, vendasit goditën menjëherë. Orgis Cena, i sapofutur në fushë, përfitoi nga një aksion i shpejtë dhe, pas asistit të Traores, dërgoi topin në rrjetë.

Drama nuk mungoi as në minutën e 70-të. Adnard Mehmeti u ndëshkua me karton të kuq për arsye jo sportive, duke lënë Vllazninë me dhjetë lojtarë. Vendimi shkaktoi protesta të forta nga tifozët shkodranë dhe arbitri u detyrua të ndërpresë takimin për rreth 15 minuta.

Pas rifillimit, Laçi vulosi fitoren. Traore shënoi golin e dytë pas një pasimi të bukur nga Fatlind Azizi. Me këtë sukses, Laçi ngjitet në vendin e katërt me 7 pikë, ndërsa Vllaznia mbetet e teta me vetëm 2 pikë dhe ende pa fitore.