Lushnja i jep shpresa Dinamos e Butrintit, Tërbuni nën presionin e Besëlidhjes e Mamurrasit

Sporti E Diel, 18 Prill 2021 22:44

Një garë e fortë në dy grupet e Kategorisë së Parë, për dy vende në Kategorinë Superiore, po e bën edhe me emocionuese betejën dhe rivalitetin mes rreth 10 ekipeve pretendente për dy vende në Superiore. Të paktën tre ekipe, në Grupin A, përkatësisht Tërbuni i Pukës, Besëlidhja e Lezhës dhe Mamurrasi, që kanë fituar edhe ndeshjet e javës së 14-të, janë pretendente për të kapur kreun. Tërbuni fitoi ndaj Burrelit 2-0 dhe ndodhet aktualisht në krye të klasifikimit, por fitorja e Besëlidhjes në Krujë ndaj Kastriotit, ndonëse minimale, si dhe e Mamurrasit në shtëpi ndaj Kamzës, 3-0, do të thotë se gara për vendin e parë mbetet ende e hapur. Edhe më interesante po bëhet gara në Grupin B. Barazimi pa gola i Lushnjës në Peqin, si dhe fitoret e Dinamos, të Butrintit e Pogradecit, ndërkohë që Sopoti i Librazhdit do të luajë të djelën, e bëjnë edhe më të fortë rivalitetin në këtë grup, për ekipin tjetër që do të ngjitet në Kategorinë Superiore. Igli Allmuça shënoi ndaj Tomorit të Beratit golin e vetëm të ndeshjes, duke i dhënë shpresë dhe shanse 18 herë kampionëve në Shqipëri, një prej ekipeve legjendë në futbollin shqiptar, që të rikthehet sezonin tjetër në Superiore. Dinamo ndodhet në vend të dytë, dy pikë pas Lushnjës, por tashmë me shpresa më të mëdha se kurrë, që pas tre sezonesh të rikthehet në elitë.

Kategoria e Parë