Martin Biba: Sporti në koma, Qeveria duhet të miratojë ligjin e sponsorizimit

Sporti në Shqipëri prej vitesh lëngon, dhe ndodhet në kufijtë e mbijetesë.

Me përjashtim të futbollit, që prodhon diçka, Federatat e tjera janë në gjendje mjerane.

Presidenti i Federatës Shqiptare të Mundjes, Martin Biba, thotë se sporti në Shqipëri është në koma.

Ai e shikon ligjin e sponsorizimit të kërkuar me insistim nga Liga Profesioniste e Futbollit, si zgjidhjen e vetme për të nxjerr sportin nga kjo situatë kaotike ku ndodhet, ndërsa sugjeroi që qeveria të kopjojë ligjin e Kosovës për sportin.

Ndikuar nga pandemia e koronavirusit, Federata e Mundjes ka ndaluar aktivitet me vendim të qeverisë.

Presidenti, Martin Biba, thotë se po punojnë me stafin e tij për të krijuar një protokoll për të zhvilluar kampionatet.

Martin Biba: Është shumë e rëndësishme ndryshimi i ligjit të sponsorizimeve të sportit në mënyrë që sporti të fillojë të marrë frymë dalë ngadalë. Kur futbolli ka probleme financiare, imagjino si janë sportet e tjera. Ta themi troç, situata është katastrofike. Çfarë kërkohet? Kërkohet ndryshimi i ligjit siç e ka Kosova. Nëse nga tatim fitimi i biznesit do të marrim 30% sigurisht që sporti çlirohet dhe fillon e merr frymë dhe bën investime në infrastrukturë, në cilësi. SHBA investon për 1 talent 1.2 deri në 1.3 milion dollar, bëjmë pyetjen se sa investohet tek ne. Është skandaloze dhe qesharake.