Mersini fjalët e parë si kuqeblu: Do të jap maksimumin për të ndihmuar Vllazninë!

Blerja e tretë për këtë sezon te skuadra e Vllaznisë, Ergis Mersini ka premtuar të bëjë më të mirën e tij për të nxjerrë ekipin shkodran nga situata e vështirë në të cilën ndodhet në tabelën e renditjes.

“Vllaznia është një emër i madh i futbollit shqiptar. Jam ndjerë mirë për këtë ofertë që më ka bërë ky emër. Për tifozerinë dhe për ekipin që ka për mua është një kënaqësi e madhe që u bëra pjesë e këtij klubi.

Besoj se do të bëj gjëra të mira për këtë ekip. I premtoj ekipit të dhe gjithë tifozerisë që do të bëj më të mirën time dhe do ta nderoj këtë ekip me punën time. Vetë pikët që tani ka Vllaznia është e rrezikuar dhe kjo është fakt. Por me afrimet që po bën dhe me grupin e lojtarëve që ka nuk do të jetë e rrezikuar deri në momentet e fundit. Mund të them se jam shumë mirë. Ndihem top në këtë drejtim. Jam në gjendjen më të mirë momentalisht dhe do të bëj më të mirën time tek Vllaznia.

Këtë e bazoj tek aftësitë që kam dhe tek dëshira e mirë për të treguar vlerat më të mira për Vllazninë. Unë do te jap më të mirën time. Konkurrenca të bën të ecësh përpara. Pastaj nëse do të jesh pjesë e 11-shes apo pjesë 18-shes, kjo i takon trajnerit. Çdonjëri do të bëjë punën e vet”, tha Mersini në prezantimin e tij në Shkodër.