Ernest Muçi, i huazuar te Trabzonspori nga Beşiktaşi në fillim të sezonit, është përqendruar maksimalisht te sfida e fundjavës kundër ish-skuadrës së tij. Forma e tij mbresëlënëse me fanellën e Trabzonsporit e ka shndërruar në një nga lojtarët më të rëndësishëm të ekipit në javët e fundit.
Mesfushori ofensiv shqiptar ka realizuar 5 gola në 3 ndeshjet e fundit të Superligës turke dhe synon të vazhdojë këtë ecuri edhe ndaj Beşiktaşit. Për 24-vjeçarin, i cili u largua nga klubi bardhezi mes kritikave dhe pakënaqësive, ndeshja e radhës ka një rëndësi të veçantë.
Gjatë dy sezoneve te Besiktasi, Muçi u aktivizua në 40 ndeshje të kampionatit, duke shënuar 7 gola dhe dhënë 3 asistime. Por te Trabzonspori duket se ka gjetur ritmin e duhur, duke hapur një kapitull krejt të ri në karrierën e tij. Me 5 golat e fundit, ai ka arritur tashmë sezonin e tij më të mirë në Superligën turke.
Për herë të parë në karrierë, Muçi ka shënuar në tre ndeshje radhazi dhe synon ta vazhdojë këtë seri edhe në derbin e fundjavës. Performanca e tij pritet me interes të madh edhe nga Sylvinho, që me këtë ritëm me shumë mundësi do ta ftojë për sfidat e muajit mars.