Napoli e mbyll me fitore kampionatin, Conte largohet me duartrokitje

Napoli e ka mbyllur sezonin 2025/2026 në Serie A me një fitore 1-0 ndaj Udineses në stadiumin “Diego Armando Maradona”, në një mbrëmje ku emocioni kryesor ishte lamtumira e trajnerit Antonio Conte.

Skuadra napolitane e mbyll kampionatin në vendin e dytë me 76 pikë, duke siguruar një sezon pozitiv dhe konsolidim në elitën e futbollit italian. Goli i fitores u shënua nga Rasmus Højlund në minutën e 24-t, pas një asisti të shkëlqyer nga Kevin De Bruyne, duke vendosur fatin e takimit.

Ndeshja nisi me ritëm të lartë dhe raste të menjëhershme për Napolin, por u shoqërua edhe me probleme dëmtimesh për vendasit. Alisson Santos u detyrua të largohej shpejt nga fusha për shkak të një problemi muskulor, ndërsa më vonë edhe Stanislav Lobotka la lojën i dëmtuar, duke komplikuar më tej situatën për ekipin.

Nga ana tjetër, Udinese mbeti me një lojtar më pak në minutën e 65-të pas kartonit të kuq të Kevin Kabasele, i ndëshkuar për ndërhyrje të ashpër pas rishikimit me VAR. Pavarësisht inferioritetit numerik, miqtë tentuan të reagojnë, por pa arritur të ndryshojnë rezultatin.

Kjo ndeshje shënoi përfundimin e aventurës dyvjeçare të Contes në Napoli, ku ai fitoi një titull kampion dhe një Superkupë të Italisë. Ndërkohë, Udinese e mbyll sezonin në Top 10 me 50 pikë, duke konfirmuar një paraqitje solide nën drejtimin e Kosta Runjaic.