“No” Shën Valentin! Nesër Kukësi-Partizani, tifozët: Vajza na vjen keq, kemi ndeshje!

Kukësi-Partizani është edhe krye-ndeshja e javës së 22-të në Kategorinë Superiore. Nesër në stadiumin “Zeqir Ymeri”, Kukësi që ndodhet në kuotën e 44 pikëve dhe mban vendin e parë bashkë me Tiranën, do të presë të kuqtë e Shpëtim Duros, një rival direkt në garë për titull. Kjo ndeshje pritet me padurim nga vendasit, që humbën një javë më parë përballjen në Laç, ndeshje aq e diskutueshme, pas goditjes së mbrojtësit Dritan Smajli. Tifozët e Kukësit, nisur nga rëndësia që ka kjo ndeshje, e cila përkon edhe me ditën e Shën Valentinin, kanë gjetur rastin të bëjnë edhe humor në faqen e tyre zyrtare. – “No Shën Valentin! Goca, na vjen keq, por kemi ndeshjen Kukës-Partizani,” shkruajnë tifozët kukësianë.  Ekipit të Kukësit i mungojnë për shkak kartonësh dhe dëmtimesh plot 5 lojtarë: Hasani, Hoxha, Peqini, Xheferson, Mici, ndërsa të kuqve kryeqytetas iu mungojnë dy pikat kryesore, Mazrekaj dhe Raçiç.