Nuk u kualifikua për në finale, Luiza Gega: Në Tiranë s’ka kushte për stërvitje!

Luiza Gega nuk ka arritur të kualifikohet në finalen e 1500 metrave në Botërorin e Atletikës në Salla të Mbyllura që po zhvillohet në Birmingam të Anglisë.

Atletja shqiptare u rendit në vendin e shtatë në baterinë e saj, duke mos arritur të kalojë më tej. Luiza Gega i përshkoi 1500 metrat për 4 minuta e 10 sekonda, kohë e pamjaftueshme për finalen. Pas garës atletja shqiptare ka reaguar, duke u jistifikuar me faktin se në Shqipëri nuk ka kushte për t’u stërvitur.

“Për fat të keq nuk munda të jem në finale dhe pse e dija që do ishte shumë e vështirë pasi dhe për mua ka qenë shumë vit i vështirë stërvitje. Të bëja fazën përgatitore në Tiranë me infrastrukturë minimale (shumë ndryshe nga shoqet e mia të garës) dhe të jem përsëri me më të mirat e botës, të them të drejtën më bën të ndihem vërtet e kënaqur dhe krenare për çfarë kam arritur dhe pse sigurisht kam mundësi për më shumë. Gjithsesi jam shumë e motivuar për çfarë do të sjell sezoni i verës, kam gara shumë të rëndësishme dhe ndihem gati për të filluar përgatitjen. (Shpresoj shumë që vëmendja nga shteti të ndryshojë sado pak)”, ka shkruar Gega pas garës.