Panucci: S’jemi në Spanjë për të qenë “viktima”

Një ditë para sfidës me Spanjën, trajneri i Kombëtares, Panucci dhe kapiteni Agolli dolën në konferencë për shtyp. Panucci me qetësi u shpreh se nuk ka asnjë emocion në veçanti, pasi synon më të mirën për Kombëtaren.

“Nuk kam asnjë emocion në veçanti. Gjëja më e rëndësishme është ekipi im dhe shpresojmë të bëjmë më të mirën”, tha Panucci.

Trajneri i Shqipërisë u shpreh se ndeshja ndaj Spanjës ka interes të jashtëzakonshëm, por Shqipëria do të bëjë më të mirën në këtë takim. “Është një ndeshje që e ndjek e gjithë bota dhe do të ketë shumë interes. Do të tentojmë maksimumin. Do të luajmë me kurajë. Këtu nuk jemi për të qenë viktima”, tha Panucci.

Sa i përket mbrojtësit spanjoll Pique dhe situatës aspak të qetë që po kalon që prej referendumit për ndarjen e Katalonjës nga Spanja, Panucci u shpreh se ai është një lojtar i niveleve të larta dhe se nuk do të ketë probleme ditën e nesërme.