Përforcimi i Interit e ndjen menjëherë presionin te klubi i madh

Matias Vecino mendon se lojtarët e Interit janë në “presion”, por thotë se “të luash në një stadium si “San Siro”, është ëndërr e çdo lojtari”.

Mesfushori i ri i talentuar, Matias Vecino, është shprehur tejet i lumtur për transferimin te Interi nga Fiorentina, duke thënë se realizoi ëndrrën fëmijërore.

“Ishte koha e duhur që të jem në një klub të madh”, tha fillimisht Vecino. “Kam edhe shumë vite në karrierë. Jam rritur shumë si lojtar që nga transferimi në Itali dhe do të përmirësohem edhe më shumë.

Isha jashtëzakonisht i lumtur kur dëgjova për interesimin e Interit dhe dëshiroja që negociatat të përfundonin sa më parë. Nuk ka për çfarë të mendohesh shumë kur të kërkon një klub kaq i madh.

Është normale të ndjejmë presionin në një klub si Interi, por më pëlqen të marr përgjegjësitë. Është ëndërr për çdo lojtar të luajë në një stadium si “San Siro” dhe për këtë jam shumë i lumtur”, shtoi Vecino.