Portieri i Anglisë rrezikon të shkaktojë aksident me Lamborghini-n e tij, kapet nga policia

Portieri i Evertonit dhe i Kombëtares së Anglisë, Jordan Pickford, është përfshirë në një incident rrugor që ka tërhequr vëmendjen e mediave britanike. Sipas raportimit të The Sun, 32-vjeçari është ndjekur nga policia pasi, me Lamborghini-n e tij, rrezikoi të shkaktonte një aksident në një rrugë në Knutsford të Cheshire.

Ngjarja ka ndodhur rreth orës 15:00 më 14 prill, pranë zonës ku banon futbollisti. Pickford ndodhej në timonin e një Lamborghini Urus me vlerë rreth 165 mijë paund, kur një efektiv policie e vuri re automjetin.

Sipas dëshmisë së policit Cecil Ricardo, Lamborghini i portierit kaloi në një kryqëzim në Princess Street dhe, sipas raportit, nuk respektoi vijat e përparësisë përpara se të futej në Toft Road. Manovra detyroi dy drejtues të tjerë të frenonin fort për të shmangur një përplasje.

Pas kësaj, automjeti i Pickford u largua me shpejtësi. Efektivi deklaroi se aktivizoi dritat blu dhe sirenën e automjetit të policisë dhe nisi ta ndiqte Lamborghini-n, i cili po udhëtonte me rreth 50 milje në orë.

Në deklaratën e tij me shkrim, oficeri përshkroi momentin kur Lamborghini u fut në rrugën kryesore dhe më pas “u largua me shpejtësi” në drejtim të Toft Road. Portieri anglez, i cili iu bashkua Evertonit në vitin 2017, njihet edhe për makinat luksoze që zotëron. Lamborghini Urus në fjalë është një automjet blu me targë të personalizuar që lidhet me emrin e tij.