Presidenti i Barcelonës zbulon të vërtetën: Pa tifozë për të dhënë mesazh politik

Barcelona luajti ndeshjen ndaj Las Palmas pa praninë e tifozëve dhe fillimisht u tha se kjo u bë për shkaqe sigurie, sepse në rrugët e qytetit po ndodhte dhuna ndaj përkrahësve të referendumit për pavarësi.

Presidenti i FC Barcelona, Joseph Bartomeu, ka zbuluar se nuk ishte siguria arsyeja pse ndeshja u luajt pa tifozë.

Ai ka bërë të ditur se klubi ishte i interesuar që ndeshja të shtyhej, por Federata e Futbollit të Spanjës e kundërshtoi dhe ekipi do të dënohej me heqjen e 6 pikëve nëse nuk luan.

“Kjo (loja pa tifozë) ishte një veprim për të treguar kundërshtimin tonë ndaj asaj që ndodhi. Nuk ishte çështje sigurie, policia na dha të drejtën të luajmë. Por ne donim të tregojmë se kjo lojë ishte ndryshe për shkak të gjithë asaj që po ndodhte në Kataloni dhe vuajtjet tona nga mungesa e lirisë këtu”, tha Bartomeu.

“Në vend që të shtyhej ndeshja – gjë që ne e kërkuam – vendosëm të luajmë me dyer të mbyllura. Kështu e treguam brengën tonë për situatën dhe dërguam mesazhin e përkrahjes për ata të cilëve u mohohet e drejta për tu shprehur lirshëm”, tha Bartomeu.