Rey Manaj reagon për largimin e Sylvinhos: Paç fat trajner dhe faleminderit!

Largimi i Sylvinhos nga pankina e Kombëtares shqiptare ka sjellë reagimet e para edhe nga futbollistët kuqezi. Pas mbylljes së aventurës trevjeçare e gjysmë të teknikut brazilian në krye të Shqipërisë, sulmuesi Rey Manaj është bërë lojtari i parë i Kombëtares që ka reaguar publikisht.

Përmes një postimi në rrjetet sociale, Manaj ka ndarë një foto së bashku me ish-trajnerin Sylvinho, duke i dedikuar një mesazh të shkurtër, por domethënës: “Paç fat trajner dhe faleminderit!”

Sylvinho largohet nga drejtimi i Kombëtares pas një periudhe që konsiderohet ndër më të suksesshmet në vitet e fundit për kuqezinjtë. Gjatë mandatit të tij, Shqipëria arriti të sigurojë kualifikimin në UEFA Euro 2024 dhe të mbajë gjallë ëndrrën për Botërorin, duke e çuar ekipin në fazën “play-off”.

Përtej rezultateve sportive, braziliani krijoi një raport të afërt me grupin e lojtarëve dhe solli një frymë të re në ambientin kuqezi, element që duket se është vlerësuar edhe nga futbollistët.