Roma bën festë ndaj Qarabag të Ansi Agollit

Qaragab-Roma ishte sfida e parë e ditës së sotme të Champions League, e cila u mbyll me fitoren 2-1 të italianëve.

Vetëm 7 minuta i janë dashur Romës për të kaluar në avantazh. Manolas është autori i golit.

Verdhekuqtë nuk ndalen dhe nuk ka sesi të mos shfaqet Edvin Dzeko. Në minutën e 15-të sulmuesi boshnjak dyfishon rezultatin.

Vendësit nuk e pranojnë këtë rezultat dhe hidhen në sulm për të gjetur golin e parë. Dhe është Pedro Henrique ai që shënon në minutën e 29-të, duke rihapur sfidën.

Në pjesën e dytë rezultati nuk ndryshon më dhe Roma merr tri pikët, duke marrë edhe përkohësisht kryesimin e grupit, në pritje të sfidës së mbrëmjes mes Atletico Madrid dhe Chelsea.

Kujtojmë që në ndeshjen ndaj Romës luajti kapiteni i Kombëtares shqiptare, Ansi Agolli, i cili u rikthye nga dëmtimi.