Rrëfimi i Igli Tares: Paradite punoja kopshtar, pasdite luaja futboll

Ish-futbollisti i Kombëtares shqiptare, Igli Tare, ishte në fokusin e emisionit të “Sky Sport” për arritjet e tij tashmë në nivel drejtuesi në Serie A.

Njeriu që u votua nga tifozët dhe gazetarët si “drejtori më i mirë sportiv” i sezonit të kaluar, u rrëfye për platformën televizive mbi karrierën dhe jetën e tij.

“Lashë Shqipërinë për të kurorëzuar ëndrrën time, që të bëhesha futbollist. Këtë e bëra në këmbë, por nuk turpërohem që e pohoj këtë. Pas gjithë kësaj aventure ishte ëndrra ime dhe jam krenar për atë që ndërmora. Në Gjermani punoja paradite si kopshtar dhe pasdite si futbollist”, tha Igli Tare.

Ish-sulmuesi i kuqezinjve rrëfeu gjithashtu se nuk e kishte besuar kur presidenti i Lazios i kishte propozuar një rol drejtuesi.

“Kisha një akord me Lottiton për të rinovuar edhe për dy vite, por kur më kërkoi të nis këtë aventurë mendova se ishte i çmendur. Kam menduar edhe largimin, sidomos pas kërcënimeve me vdekje. Në disa momente kisha frikë për fëmijët, në periudhën kur Lazio shiti Hernanesin. Një pjesë e imja vdiq aty, për sa i përket mënyrës si jetohet futbolli. Me ato kërcënime prek vërtet pjesën më të keqe të këtij sporti”, tha Tare.