Sejdini flet pa “dorashka”: De Biasin e hoqi Duka sepse pati prishje të kompromiseve të tyre

Sporti E Hënë, 12 Korrik 2021 19:27

Ish-trajneri i mirënjohur i futbollit shqiptar Faruk Sejdini, i ftuar në News24 në emisionin “Fair Play” nga Enkeleida Zeko ka komentuar vizitën e ish-trajnerit të Kombëtares Gianni de Biasit në stadium për ndeshjen mes Shqipërisë dhe Lihtenshteinit. Sejdini ka folur pa “dorashka” duke u shprehur se trajnerin italian e hoqi Duka dhe se ishte një prishje e kompromiseve të tyre.

“Për mendimin tim, De Biazin e hoqi presidenca. Ishte një prishje e kompromiseve të tyre dhe arriti deri në atë pikë. Unë e kam thënë edhe më parë, madje në këtë studio, që De Biasi do kthehet sërish në Shqipëri, edhe pas largimit”, tha Sejdini.

Ndërsa, pas deklaratës së Biasit, ku tha se kishte ardhur me ftesë të mikut të tij Armand Duka, Sejdini e krahasoi këtë situatë si në ftesat e kohës së komunizmit.

“Kjo është njësoj si në komunizëm. Po të shikoni, të gjithë ata që pushkatoheshin, linin një letër ku thuhej: Nuk ka faj as Partia dhe as Enveri. Kështu është edhe kjo situatë e tanishme me De Biazin”, u shpreh Sejdini.