Shah, Llambi Pasku shpallet Kampion Kombëtar për vitin 2017

Për 9 ditë me rradhë, 10 finalistë të kualifikuar matën forcat mes tyre në një garë të luftuar deri në raundin e fundit. Kjo edhe për faktin se ishte finalja e parë në historinë e shahut shqiptar ku u aplikua vleftshmëria e variacionit ELO nga FIDE, siç e shpjegoi instruktori kombëtar i FIDE, z.Arian Bllaca.

Në përfundim të 9 raundeve, vendi i parë i takoi mjeshtrit Llambi Pasku i klubit “Tirana” me 7,5 pikë, i cili përmirësoi rejtingun ndërkombëtar me plus 34 njesi. Në vendin e dytë dhe të tretë u renditën me 6,5 pikë, Mjeshtri Ndërkombëtar Dritan Mehmeti dhe Mjeshtri i FIDE, Franc Ashiku.

Fjalë të mira duhen thënë edhe për shahistin me moshë relativisht të re, Riza Bregu, i cili zhvilloi një garë dinjitoze duke u renditur në vendin e pestë, fill mbas Mjeshtrit Ndërkombëtar Ilir Seitaj. Progresi në rejting i Riza Bregut ishte plot plus 70 njësi ELO.

Në këto finale performoi edhe 16-vjeçari Zino Veleshnja, i cili zhvilloi lojëra të forta duke lënë pas 2 finalistë dhe përmirësuar rejtingun ndërkombëtar me plus 35 njësi, falë kjo edhe barazimeve ndaj MN Mehmeti dhe MN Seitaj.