Shënoi kundër Skënderbeut, Moraes: Na foli trajneri në pushim, të kënaqur vetëm me pjesën e dytë

Pjesa e dytë e takimit Dinamo Kiev-Skënderbeu filloi me një zëvendësim që do të rezultonte tepër deçiziv për ndeshjen. Sulmuesi Junior Moraes mori vendin e Garmash duke sjellë freski në repartin ofensiv e për pasojë rrezikshmëri më të madhe.

Moraes përveçse ndryshoi rrjedhën e lojës shënoi edhe golin e dytë. Në intervistën pas ndeshjes theksoi se ishin fjalët e trajnerit në dhomat e zhveshjes ato që i dhanë një udhë tjetër takimit.

“Ne arritëm fitoren, ndjehem mirë dhe jam i lumtur që siguruam këtë rezultat. Pjesa e parë? Nuk jemi edhe aq të mirë kur fillojmë ndeshjen por pastaj në pushim trajneri na tregoi disa gjëra që duhej të rregullonim dhe pjesa e dytë ishte më e mirë”, tha Moraes, autor i golit të dytë për Dinamos.

“Me dy sulmues ne kishim shumë mundësi shënimi, kishte edhe shumë dyluftime. Mund të them se jemi të kënaqur me pjesën e dytë të ndeshjes. Sigurisht që më pëlqen të luajmë me dy sulmues, kemi më shumë mundësi lëvizjeje dhe të luajmë në sulm”, tha ai duke falënderuar tifozët që i kishin duartrokitur edhe pasi skuadra kishte pësuar gol.