Shkatërruan stolat në “Air Albania”,arreston tifozin 19-vjeçar

Një 19-vjeçar me inicialet F.Z., banues në Tiranë, është arrestuar nga policia pasi akuzohet se gjatë ndeshjes Tirana-Kukësi ka thyer stolat e stadiumit “Air Albania” dhe ka hedhur sende të forta në fushën e blertë. Ndaj tij rëndon akuza për veprat penale “Shkatërrimi i pronës” dhe “Prishja e qetësisë publike”

Po sot, Gjykata e Tiranës caktoi masat e sigurisë për tre të arrestuarit e tjerë. Në burg është lënë L.G, i cili dëmtoi stolat gjatë ndeshjes Kukësi-Tirana. Ndërkohë që për tifozët me iniciale G.M dhe K.B, dy tifozët e tjerë që hodhën çakmakët në fushë në ndeshjen Bylisi-Partizani, është caktuar masa e sigurisë “detyrim paraqitje”.

Për ndeshjen e bardhebluve kundër Kukësit, ku u shkatërruan 164 stola, janë shpallur në kërkim edhe 9 persona të tjerë, ndërsa gjashtë janë proceduar penalisht.

Përveç shkatërrimit të stolave disa prej tifozëve hodhën edhe sende të forta në fushë, më së shumti shishe uji. Ata akuzohen konkretisht për dy vepra: “Veprime të dhunshme në aktivitetet sportive” si dhe “Shkatërrimi i pronës”. Sipas policisë personat e arrestuar, të proceduar dhe të shpallur në kërkim janë kapur në flagrancë.