Shtohen telashet për Piolin, ndaj Sampdorias do të mungojë edhe lideri i mesfushës

Milani vijon të jetë në krye të kampionatit italian, pavarësisht fitoreve të Juventusit dhe Interit. Skuadra e Stefano Piolit do të udhëtojë sot drejt Gjenovës, për t’u përballur në mbrëmje me skuadrën e Sampdorias, ndërsa tekniku i kuqezinjve do të duhet të bëjë pa shërbimet e tre prej titullarëve më të spikatur gjatë këtij viti.

I fundit që i është shtuar infermierisë pas Ibrahimovic dhe Kjaer është Ismael Bennacer. Mesfushori algjerian ka pasur shpesh probleme muskulore javët e fundit dhe për shkak të një lodhjeje më tepër se e zakonshmja, është vendosur që të mos grumbullohet për sfidën e mbrëmjes së sotme ndaj Sampdorias.

Sandro Tonali pritet të marrë vendin e titullarit në mesfushë, në krah të Franck Kessie, ndërsa në mbrojtje, në vendin e Kjaer do të luajë sërish i riu Matteo Gabbia, që po gjen shumë hapësira këtë sezon dhe po rritet vazhdimisht.