Skënderbeu “po marshon”, presidenti Ardian Takaj-Kukësit: Hap krahun!

Në dy sezonet e fundit, Skënderbeu është shpallur kampion dhe Kukësi është renditur në vend të dytë. Këtë sezon, pas javës së 22-të, Kukësi ndodhet  në krye të klasifikimit, bashkë me Tiranën, në kuotën e 47 pikëve, tre pikë më tepër se Skënderbeu. Por ndeshjet e fundjavës rezervojnë një përplasje mes Skënderbeut dhe Kukësit, në Korçë. Rivaliteti mes dy ekipeve sa vjen dhe bëhet më i ashpër, por për presidentin e Skënderbeut, Ardian Takaj, nuk ka ndonjë dyshim se në fund të sezonit skuadra e tij do të kurorëzohet me titullin e pestë radhazi kampion. Fitorja e fundit me Flamurtarin 3-1 dhe kualifikimi për në gjysmëfinale të Kupës së Shqipërisë i kanë shtuar edhe më tepër besimin numrit një të klubit korçar. I pyetur në lidhje me ndeshjen ndoshta vendimtare për titull ndaj Kukësit, pas kualifikimit me Flamurtarin në kupë, Takaj është shprehur: – “Skënderbeu tashmë i ka ndezur motorët për sprintin final, ndaj Kukësi do të hapë krahun.”  Përballja e radhës direkte mes dy ekipeve pretendente do të zhvillohet të hënën, ora 18.00, në Korçë. Një fitore e mundshme e Skënderbeut do ta barazonte atë me pikë me Kukësin, dhe do ta vinte në rrugë drejt titullit kampion.