Zbulohen prapaskenat e sherrit Starova-Trashi, mesfushori mori ofertë nga një klub turk

Partizani është duke kaluar një moment të vështirë jo vetëm për shkak të rezultateve në 16 javët e para, por dhe përplasjeve që ka patur me futbollistë të veçantë. I fundit është rasti i Lorenc Trashit, teksa në orët e fundit kanë filluar që të zbardhen dhe prapaskenat e sherrit mes tij dhe trajnerit Starova në miqësoren e fundit të zhvilluar në Turqi.

Lojtari dhe klubi i Partizanit kishin përplasje edhe para se të ndodhte sherri i madh që ndodhi në fazën përgatitore në Antalia, të Turqisë. Në dhjetor, kur merkatoja e janarit akoma nuk kishte nisur, drejtuesit e klubit kanë marrë një ofertë zyrtare nga një klub turk, emri i të cilit nuk është zbuluar.

Klubi turk kishte bërë gjithçka gati për transferimin, teksa priste vetëm aprovimin e klubit të Partizanit. 25-vjeçari mori një përgjigje negative nga të kuqtë, të cilët nuk e lejuan që ai të kalonte në një kampionat të rëndësishëm në Europë, teksa do të ishte dhe një trampolinë e mirë për të arritur në kombëtare.

Largimi i Vilës, Malotës dhe Krasniqit së fundmi i shtuan edhe më shumë dëshirën për t’u larguar nga klubi, derisa erdhi dhe përplasja me Starovën.