Vdekja e dy adoleshentëve, dy ditë më parë në Durrës, dyshohet se erdhi si pasojë e gjendjes së dehur të shoferit që përplasi çiklomotrin, por dhe shoferit që drejtonte këtë të fundit.
Drejtuesi i çiklomotorrit, djali i të cilit humbi jetën së bashku me një të mitur tjetër në aksidentin e Shkozetit, u arrestua këtë të enjte.
Të dy drejtuesit e mjeteve kanë qenë në gjendje të dehur. Specialistët e qarkullimit rrugor në Durrës arrestuan në flagrancë shtetasit Xhulio M., 22 vjeç dhe Sokol K., 47 vjeç, të dy banues në Durrës.
Arrestimi i tyre u bë pasi natën e vonë të 8 shkurtit në rrugën “Bajram Tusha”, në Shkozet, lagjja nr.14 e Durrësit 22-vjeçari, duke drejtuar mjetin në gjendje të dehur është përplasur me një motomjet që drejtohej në gjendje të dehur nga 47-vjeçari.
Për pasojë ka humbur jetën në vendngjarje shtetasi Franc K. 16 vjeç, djali i drejtuesit të çiklomotorrit dhe u dëmtua rëndë shtetasi Daniel H., i cili humbi jetën më vonë në spital. Gjithashtu, si pasojë e aksidentit kanë mbetur të dëmtuar edhe shtetasit D. Q. dhe M. A., të cilët ndodhen jashtë rrezikut për jetën.
