Më 31.10.1987, në orën 6.15, në postën e kufirit Peshkëpi në Gjirokastër, në përpjekje për të kaluar kufirin, u vra në kokë me armë zjarri shtetasi Pandeli Sotir Mërtiri nga Qeparoi dhe u ndalua i plagosur shtetasi Thoma Zoi Skarço i vitlindjes 1963, nga Vlora. Thomai e kish njohur Pandeliun kur kryente shërbimin e detyrueshëm ushtarak në Qeparo.
Thomai dhe Pandeliu u nisën më 29.10.1987 me tren nga Vlora në Ballsh. Prej këtu udhëtojnë me një makinë tip “Skoda” për në Gjirokastër. Atje flenë në dhomën e një studenti. Më 30.10.1987 u nisën me autobus në Jorgucat, por zbresin në Grapsh dhe i drejtohen kufirit. Nën klon hapën me thikë një gropë për të kaluar nën tela, por këtu japin sinjalin pa dashje. Në orën 4.05 në postë ishte dhënë sinjali i prekjes së aparaturës elektrosinjalizuese (klon). Komisari i postës fikson sinjalin dhe merr masa bllokimi, duke ngritur postën në kushtrim. Njëkohësisht njoftohet komandanti i Repartit nr.185 Jergucat, i cili ngre në kushtrim postat fqinjë kufitare të Buretos e Radatit, si dhe forcat vullnetare të fshatrave Peshkëpi, Glinë, Vllahogoranxi, duke u vënë detyra konkrete. Ushtarë e kuadro ishin në rrethim. I kanë pikasur dhe i kanë qëlluar me breshëri kallashnikovi. Në fillim u vra Pandeliu (për të cilin ushtarët thanë “e vramë njërin”), ndërsa Thomai ndryshoi drejtim 200 metra, por nuk mundi të vazhdojë dot sepse u plagos në krah dhe u rrëzua. Të dyve iu gjetën gjatë kontrollit adresa në Greqi dhe SHBA. Ushtarët që bënë vrasjen u propozuan për dekorim (“medalja e trimërisë”).
Gjykata Popullore e Rrethit Vlorë, me vendimin nr.3, datë 14.1.1988, e deklaroi fajtor Thoma Skarçon për fajin e tradhtisë ndaj atdheut në formën e arratisjes në bazë të neneve 47/gj e 11/2 të Kodit Penal dhe e dënoi me 16 vjet heqje lirie dhe heqjen e së drejtës zgjedhore për 5 vjet. Thomai u lirua më 10.1.1991 nga Reparti nr.321 Burrel sipas dekretit nr.7444, datë 5.1.1991 të Presidiumit të Kuvendit Popullor.
1987/Pandeli Mërtiri u vra në kufi, vrasësit u dekoruan me “medaljen e trimërisë”
