Drejtori i Policisë, Hita takim me ambasadorin e Holandës! Nga bashkëpunimi në gjurmimin tek sekuestrimi i aseteve kriminale

Drejtori i Përgjithshëm i Policisë së Shtetit, Skënder Hita mirëpriti në ambientet e DPPSh-së Ambasadorin e Holandës, Reinout Vos dhe Oficerin e Kontaktit të Holandës atashuar në Policinë e Shtetit, ku mori prej tij letrën e urimit të dërguar nga homologia e tij, Drejtoresha e Policisë holandeze.

“Shpreh konsideratën time më të lartë për ju dhe Policinë e Shtetit shqiptar, dhe ju uroj shumë suksese në detyrën tuaj. Të dyja, Policia holandeze dhe Policia e Shtetit, bashkëndajnë angazhimin e lartë në luftën kundër krimeve ndërkufitare. Marrëdhëniet ndërmjet vendeve tona po forcohen vazhdimisht dhe jam e bindur se, nën drejtimin tuaj, bashkëpunimi mes Shqipërisë dhe Holandës do të vijojë të prosperojë”, shprehet drejtoresha e Policisë holandeze, Janny Knol, në letrën drejtuar Hitës.

Hita falënderoi Ambasadorin për praninë e tij në ambientet e DPPSh-së, si dhe përcolli nëpërmjet tij konsideratën e lartë reciproke për homologen e tij, Knol. Drejtori u shpreh se bashkëpunimi i strukturave të specializuara të Policisë së Shtetit me agjencitë ligjzbatuese në Holandë ka dhënë rezultate konkrete në lokalizimin, kapjen dhe ekstradimin e shtetasve të kërkuar ndërkombëtarisht, krijimin dhe funksionimin e skuadrave të përbashkëta hetimore, shkëmbimin në kohë reale të inteligjencës kriminale, si dhe në gjurmimin dhe sekuestrimin e aseteve kriminale.

Kryepolici theksoi gatishmërinë absolute të tij dhe të Policisë së Shtetit për të qenë plotësisht të hapur dhe të angazhuar për aspekte të ndryshme bashkëpunimi që do të referohen në të ardhmen nga Oficeri i Kontaktit. Ambasadori Vos uroi Drejtorin për marrjen e detyrës dhe vlerësoi vizionin e tij për drejtimin e Policisë së Shtetit, duke e garantuar për mbështetjen e palëkundur dhe të vazhdueshme të agjencive ligjzbatuese të Holandës, për përmbushjen e objektivave të përbashkët, si dhe për forcimin e mëtejshëm të sigurisë dhe luftës kundër kriminalitetit ndërkufitar, bazuar në besimin reciprok tashmë të fituar.

Në fokus të takimit ishin prezantimi i vizionit nga Hita për një polici moderne, të besueshme dhe sa më pranë qytetarëve, si dhe afirmimi i angazhimit për një partneritet solid ndërmjet strukturave të Policisë së Shtetit dhe agjencive ligjzbatuese në Holandë, në luftën kundër krimit të organizuar ndërkombëtar.