Aksidentoi 14-vjeçaren me motor dhe u largua, Policia: 18-vjeçari drejtonte pa patentë

Një 14-vjeçare është aksidentuar mesditën e sotme në fshatin Shalës të Cërrikut nga një motomjet që drejtohej nga një 18-vjeçar pa leje drejtimi. Pas aksidentit, i riu dyshohet se është larguar nga vendi i ngjarjes, por është identifikuar dhe arrestuar më pas nga policia. Ngjarja ndodhi rreth orës 13:10. Sipas policisë, 18-vjeçari A. N., banues në Belsh, po drejtonte motomjetin pa leje drejtimi kur aksidentoi të miturën. Pas largimit të tij nga vendi i aksidentit, shërbimet e policisë nisën kërkimet dhe arritën ta identifikonin, lokalizonin dhe kapnin.

Njoftimi i plotë i Policisë

“Aksidentoi një 14-vjeçare me motomjetin që drejtonte pa leje drejtimi dhe u largua nga vendi i aksidentit, identifikohet dhe arrestohet 18-vjeçari. Specialistët e Qarkullimit Rrugor arrestuan në flagrancë shtetasin A. N., 18 vjeç, banues në Belsh, për veprat penale “Shkelja e rregullave të qarkullimit rrugor” dhe “Largimi nga vendi i aksidentit”.

Ky shtetas dyshohet se sot, rreth orës 13:10, në fshatin Shalës, duke drejtuar motomjetin, pa leje drejtimi, ka aksidentuar një 14-vjeçare dhe u largua nga vendi i ngjarjes. Falë reagimit në kohë dhe veprimeve të shpejta të shërbimeve të Policisë, u bë i mundur identifikimi, lokalizimi, kapja dhe arrestimi i 18-vjeçarit. Ndërkohë, 14-vjeçarja është transportuar dhe ndodhet në spital, në kujdesin e mjekëve.

Materialet procedurale do t’i referohen Prokurorisë, për veprime të mëtejshme”