“Gjiro Open Air”/ Rama: Vitin e ardhshëm Kampionati Europian i sporteve të ajrit në Gjirokastër

“Gjiro Open Air”, kampionati i përvitshëm i paragliding startoi të premten në aerodromin e Gjirokastrës, ndërsa krahas nxitjes së sporteve të ajrit synon edhe tërheqjen e turistëve.

Kryeministri Edi Rama ndau sot në rrjetet sociale pamjet e spektaklit të “Gjiro Open Air”, tanimë i kthyer në shtëpinë e këtij eventi të madh sportiv mbarëkombëtar.

Rama bëri të ditur se vitin e ardhshëm do të organizohet Kampionati Europian i paragliding.

“Pamjet e spektaklit të “Gjiro Open Air” në aerodromin e Gjirokastrës, tanimë i kthyer në shtëpinë e këtij eventi të madh sportiv mbarëkombëtar, ku vitin e ardhshëm do të organizohet Kampionati Europian”, shkruan Rama.

Aktiviteti organizohet nga Federata e Aeronautikës dhe në garë marrin pjesë rreth 45 parashutistë nga vende të ndryshme të botës që realizojnë fluturime në kategori të ndryshme të sporteve të ajrit parashutë dhe paramotor.