Ish-deputeti i PS: Nëse nuk ka zgjidhje, 97′ do të duket si ëndërr e bukur

Ish-deputeti socialist, Petro Koçi, ka reaguar lidhur me ngjarjet e fundit në Tiranë.

Në një posti në rrjetet sociale, Koçi shkruan se nëse zgjidhjet politike bëhen të pamundura, Shqipëria rrezikon të përballet me skenarë edhe më të rëndë se ai i vitit 1997.

Nga Petro Koçi

Ky entuziazmi i disa deputetëve të PS kur postojnë imazhin e Balliut në Lanë më duket një budallallëk dhe bumerang.
Më kujton ëndrrën e Saliut për ta tërhequr Edi Ramën zvarrë në Lanë.
Emri, sigurisht që ka rëndësi.
Dhe Balliu nuk është as Rama e as vetë Saliu.
Por më i rëndësishëm është modeli që promovon.
Po legjitimon «zgjidhje» rruge në raport me zgjidhjet politike.
Zgjidhjet e rrugës dhe turmave nuk ngopen vetëm me kokën e Ramës që kërkojnë aktualisht.
Prania besnike është një ofertë amatoreske dhe jo një reflektim serioz i përgjegjshëm.
Çlirojeni Kushtetutën nga 21 prilli berishian i 2008-ës, garantoni veprim të drejtësisë për këdo, pavarësisht nga emri apo hierarkia, ndryshoni sistemin zgjedhor nga ngërçi i pabarazisë së shanseve, rivendosni demokracinë në funksionimin e partisë, shërojeni administratën nga korrupsioni etj.!
Nëse zgjidhjet politike bëhen të pamundura, atëherë ’97-a do të duket si ëndërr e bukur.
Turma e tanishme nuk është ajo e viteve ’90.
Situata ndërkombëtare nuk është ajo e ’97-ës.
Europa tashmë është përfshirë nga trazira, halle dhe pikëpyetje të mëdha e nuk e ka ngejen e atij viti.
SHBA nuk foli mbrëmë për të mbështetur një parti apo një individ, por për të mbrojtur Shqipërinë nga kaosi, influencat e huaja hakmarrëse dhe delegjitimimi i procesit politik.
Mos lejoni, duke ndërmarrë reflektim dhe reforma serioze, që turma të kthehet në polici morale mbi ju dhe shumicën qytetare e nesër të urdhërojë mendimin e jo thjesht mënyrën e shprehjes së tij.