Moti i keq/ Kryebashkiaku i Kukësit: Banorët të kontribuojnë në zgjidhjen e problemeve

Gjatë mbledhjes së Shtabit të Emergjencave Civile, kryetari i bashkisë së Kukësit u ka kërkuar qytetarëve të prekur nga moti i keq që të kontribuojnë edhe personalisht për zgjidhjen e problemeve. Ai tha se qytetarët nuk duhet t’i kenë sytë vetëm nga shteti kur bëhet fjalë për bllokimin e rrugëve apo probleme të tjera që shkaktohen nga moti i keq.

Në Kukës është mbledhur Shtabi i Emergjencavëe Civile, për të vlerësuar situatën e krijuar si pasojë e reshjeve të dëborës dhe shiut në gjithë qarkun.

Kryetari i bashkisë së Kukësit kërkoi nga qytetarët që jo çdo gjë duhet ta presin nga strukturat shtetërore, por të kujdesen edhe vetë me zgjidhje provizore.

Bashkim Shehu apeloi edhe pronarët e bizneseve që të kontribuojnë në kalimin e situatave emergjente.

Ndërkohë situata në Kukës ka qenë e qetë. Energjia elektrike është rikthyer në pjesën më të madhe të fshatrave dhe po punohet nga grupet e OSHEE-së për linjat e dëmtuara edhe në ato zona ku ende mungon.