Projektligji, ja si do bëhet Vettingu në Polici; Zbardhet çfarë duhet deklaruar

Zbardhet projektligji i Ministrisë së Brendshme për Vettingun në polici. Komisioni i Jashtëm i vlerësimit, Komisioni Qendror i Vlerësimit, Komisioni Vendor dhe i Posaçëm do të jenë organet e reja, që sipas projektligjit të Vettingut në polici, do të kalojnë në sitë 12 mijë efektivë të Policisë së Shtetit.

Aty përfshihen që nga zinxhiri komandues deri tek inspektoret së bashku me 1 mijë efektivë të Gardës së Republikës si edhe rreth 100 punonjësit e Shërbimit të Çështjeve të Brendshme dhe Ankesave.

Vettingut mund t’i nënshtrohen me dëshirë edhe ish-punonjësit e policisë nën moshën 55 vjeç, përfshirë edhe të shkarkuarit nga detyra, por që gjykata u ka dhënë të drejtë, duke shfuqizuar urdhrin e shkarkimit.

287 zyrtarët më të lartë të policisë që nga drejtori i përgjithshëm deri tek shefat e komisariateve do t’i kontrollojë Komisioni i Jashtëm i Vlerësimit, që do të përbëhet nga 15 anëtarët , të zgjedhur nga Inspektorati i Kontrollit të Pasurive, nga bota akademike dhe avokatia.

2700 punonjës të policisë me grada të mesme dhe 115 nga garda përfshi edhe repartet speciale RENEA, FNSH dhe Forcat e Posaçme operacionale do të kontrollohen nga komisioni qendror.

Ndërkohë siç parashikohet, të gjithë efektivët e thjeshtë do të kontrollohen nga 135 anëtarë të komisioneve vendore, shumica e të cilëve do të jetë policë që do ta kalojnë të parët Vettingun nga Komisioni Qendror i Vlerësimit.

Të dhënat që duhet të plotësojnë 12 mijë policë

12 mijë efektivët e policisë në të gjithë vendit të cilët do ti nënshtrohen procesit të vettingut do ntë duhet të plotësojnë këta dy formularë. Në formularin e parë policët do të deklarojnë pasurinë, ndërsa në të dytin do të pyeten për pastërtinë e figurës së tyre.

Shefat e policisë dhe të gjithë punonjësit e tjerë, do deklarojnë pronat e blera ose të trashëguara, makinat që përdorin dhe paratë që kanë në llogaritë bankare.

Po kështu në formular, shefat e policisë dhe oficerët do të tregojnë udhëtimet që kanë kryer jashtë shtetit në 3 vitet e fundit, përfshirë familjarët e tyre. Edhe shkollat private brenda apo jashtë vendit ku kanë arsimuar fëmijët, policët duhet ti specifikojnë në formularin për pasurinë.Duke filluar nga data 1 janar 2012, policët do bëjnë publike nëse kanë biznese apo borxhe ndaj personave të tjerë.

Një tjetër formular i rëndësishëm që do plotësohet nga uniformat blu, është edhe ai për kontrollin e figurës.Në formularin e dytë policët do specifikojnë nëse kanë pasur emër tjetër, apo ndonjë nofkë që e kanë thërritur nga personat e tjerë. Gjithashtu do tregohen të gjitha adresat e banimit, të dhënat për arsimit si dhe të gjitha punët që kanë kryer nga data 1 janar 2012. Ashtu si ligji i dekriminalizimit për deputetët, policët duhet të shkruajnë në formularë, nëse janë dënuar ndonjëherë, apo janë ndaluar brenda dhe jashtë Shqipërisë.

Për herë të parë oficerët e policisë do të bëjnë publike nëse ndonjë nga familjarët e tyre është i lidhur me krimin e organizuar. Pikërisht pyetjet për krimin e organizuar do të jenë më interesantet, pasi uniformat blu duhet të deklarojnë nëse janë takuar ndonjëherë me anëtarët e grupeve kriminale apo nëse kanë marrë dhurata dhe para nga krimi i organizuar.

Policët duhet të shkruajnë me detaje nëse konsumojnë lëndë narkotike, por edhe nëse kanë varësi nga alkooli apo lojërat e fatit. Në fund të çdo formulari specifikohet se nëse plotësojnë të dhëna të pasakta, policët do të lirohen nga detyra.

Por ajo që pritet të hapë diskutime në këtë proces është barra e provës që i bie sipas projektligjit efektivit që do të verifikohet për çdo dyshim që do të hidhet ndaj tij, qoftë ai edhe i servirur nga publiku. Marrë nga Ora News