Protesta përshkallëzohet në dhunë, gurë dhe gaz lotsjellës para Kryeministrisë

Një grup protestuesish janë grumbulluar sërish para godinës së Kryeministrisë, ku situata është tensionuar pas përplasjeve me forcat e Policisë, të cilat ndodhen në terren për të garantuar sigurinë dhe për të mbrojtur institucionin nga sulmet e dhunshme.

Protestuesit kanë nisur të hedhin gurë dhe sende të forta në drejtim të efektivëve të Policisë, duke përshkallëzuar tensionet para godinës së Kryeministrisë. Në përgjigje të situatës, forcat e rendit kanë përdorur ujë dhe gaz lotsjellës për të shpërndarë turmën dhe për të frenuar sulmet. Prania e shtuar e forcave të Policisë synon të parandalojë përshkallëzimin e mëtejshëm të situatës dhe të mbrojë institucionin nga dëmtimet e mundshme. Përplasjet kanë krijuar një klimë të tensionuar në zonën përreth Kryeministrisë, ndërsa zhvillimet në terren vijojnë të jenë në qendër të vëmendjes.

Kjo situatë vjen pas tri ditësh protestash të shoqëruara me episode dhune, gjatë të cilave protestues kanë sulmuar me gurë, bomba molotov dhe sende të forta institucione publike, banka dhe biznese private. Këto akte kanë ngritur shqetësime për sigurinë publike, dëmtimin e pronës dhe rrezikun për qytetarët, punonjësit e institucioneve dhe efektivët e Policisë. Ndërsa protesta vijon para Kryeministrisë, mbetet për t’u parë nëse situata do të qetësohet apo do të ketë përshkallëzim të mëtejshëm të përplasjeve.