Juventusi mund të sigurojë që nesër një biletë për në fazën me eliminim direkt në Champions nëse do të fitojë edhe duelin e kthimit ndaj XZenitit. Trajneri i bardhezinjve, Massimiliano Allegri, ka folur ashpër ndaj lojtarëve të tij pas dy humbjeve radhazi në kampionat.
“Kualifikimi është objektivi ynë i parë dhe do ishte i bukur nëse do ta arrinim kur duhen edhe dy ndeshje. Kjo do të na lejonte që të përqendroheshim në kampionat. Në këtë moment, jemi të gjithë të zemëruar sepse në 5 ditë kemi hedhur në plehra punën e një muaji e gjysmë. Kjo duhet të na bëjë të reflektojmë dhe të punojmë më shumë që të përmirësohemi.
Kemi pësuar 15 gola, 11 prej të cilëve në 6 ndeshje kundër ekipeve që na kanë mundur me meritë, por që renditen nga vendi i dhjetë deri në të fundit”, shtoi Allegri.
Pas 11 javësh kampionat, bardhezinjtë renditen në vendin e nëntë me 15 pikë, plot 16 pikë më pak sesa kryesuesit Napoli dhe Milan. Në Champions ndërkohë janë në krye të grupit me pikë të plota, 9.
