Kryebashkiaku aktual i Shkodrës, Bardh Spahia ka konfirmuar se do të marrë pjesë në procesin e Primareve, që do të zhvillohen nga Partia Demokratike për të nxjerrë kandidatët e zgjedhjeve të ardhshme lokale. Ai thotë se do të garojë për të marrë tashmë një mandat të plotë në kryeqendrën e veriut të vendit.
“Do ketë primare edhe në Shkodër, nuk ka sesi të jetë ndryshe. Primaret kanë qenë jo vetëm risi, por në rastin e Shkodrës një histori suksesi siç e vërtetoi rezultati i 6 marsit. Patjetër do të marr pjesë në procesin e primareve.
E konsideroj detyrim karshi qytetit tim, qytetarëve të mi mundësinë e projektimit të Shkodrës në vendin që i takon jo vetëm në raport me pjesën tjetër të Shqipërisë por dhe në rajon e më gjerë. Kemi sfida përpara, kemi ide të jashtëzakonshme të cilat synojmë ti vëmë në jetë në një mandat të plotë. E konsideroj një detyrë dhe përgjegjësi të lartë karshi tyre”.
