Drejtori i Policisë së Shtetit, Muhamet Rrumbullaku këtë të martë mori pjesë në ceremoninë e organizuar në Dhërmi, për dhurimin e pajisjeve të cilat iu dorëzuan departamentit të Policisë Kufitare dhe Migracionit nga Bashkimi Evropian.
Ai tha se projekti “Mbështetja e BE-së për menaxhimin efektiv të kufijve të gjelbër dhe detar në Shqipëri”, është një nga projektet më të rëndësishme për përballimin e sfidave të reja të sigurisë kufitare, siç është emigracioni i parregullt që ka goditur kufijtë e vendeve të rajonit, kriminaliteti ndërkufitar, veçanërisht trafiqet e paligjshme.
Sipas tij, “sistemet e mbikëqyrjes së kufirit dhe trajnimi i personelit për përdorimin e tyre, kanë siguruar kapacitete operacionale për mbikëqyrjen e dy zonave më të nxehta të kufirit shtetëror me Republikën e Greqisë, dhe rezultatet kanë qenë të prekshme që në ditët e para të vënies në përdorim”.
“Njësia e lëvizshme e mirëmbajtjes së mjeteve lundruese, e pajisur me të gjitha mjetet dhe pajisjet e nevojshme, përveç aspektit ekonomik, ka mundësuar dhënien e shërbimeve për mjetet lundruese, në vendin e shërbimit, pa qenë nevoja të transportohen pranë Repartit “DELTA”. Kjo mundëson gatishmërinë operacionale të mjeteve lundruese në çdo kohë, në stacionet ku ato janë të dislokuara”, nënvizoi Rrumbullaku.
Rrumbullaku falënderoi edhe implementuesin e Projektit, ICMPD (Qendrën Ndërkombëtare të Zhvillimit të Politikave të Migracionit), që me profesionalizmi e punonjësve të saj dhe bashkëpunimin me strukturat e Departamentit të Policisë Kufitare dhe Migracionit, mundësuan implementimin pa pengesa dhe në kohë të këtij projekti.
