Kryetari i PD-së, Sali Berisha nga Mirdita, e që sot është 100 vjetori i lidhjeve diplomatike me SHBA, komentoi vizitat e ish-zv.Presidentit të SHBA-së, Mike Pence dhe Mike Pompeos në Shqipëri.
Berisha tha se Pence erdhi rreth 1 muaj më parë në Shqipëri dhe nuk zhvilloi takim me asnjë zyrtar. Gjithashtu Pompeo, sipas Berishës, u pendua dhe në njoftimet e bëra për shtyp për vizitën në Shqipëri, nuk përmendi asnjë takim me zyrtarët shqiptarë.
”Para 1 muaji erdhi këtu ish-zv.Presidenti i SHBA-së. Një burrë i respektuar nga vendi i tij, nuk u takua me asnjë zyrtar. U takua me muxhahedinët iranianë. U kthye direkt në vendin e tij. Pse kjo, sepse ta themi me fjalë popullore, nuk donte të merrte pleshta. Nuk donte. Kë do të takonte, dilte ajo që ndodhi me Mike Pompeon. Erdhi dhe ai, dhe e dërguan gjoja në konferencën e 100-vjetorit. Kush e organizonte, e organizonte një eksponent kryesor i bandës së Elbasanit që quhet Taulant Balla. Kur e mori vesh, u largua dhe në njoftimin në shtyp, nuk citoi asnjë shqiptar. Takoi MEK-un dhe asnjë shqiptar. I fshiu takimet dhe u largua. Janë motive për ne që të bëjmë gjithçka për të shpëtuar Shqipërinë, nga kjo qeveri”.
