Bolton libër kundër Trump

Demokratët në Amerikë po bëjnë thirrje që Xhon Bolton, ish-këshilltari për sigurinë i presidentit Donald Trump, të dëshmojë para Senatit kundër ish-eprorit të tij.

Raportohet se Bolton ka shkruar një libër memuaristik i cili del kundër qëndrimeve të presidentit për çështjen e Ukrainës.

Ish-këshilltari pretendon se në bisedat me kreun e Shtëpisë së Bardhë, Trump donte të bllokonte asistencën ushtarake me vlerë 391 milionë dollarë për Kievin nëse nuk hetohej rivali i tij demokrat, Xho Bajdën, dhe djali i tij, i cili atëkohë punonte për një kompani energjetike.

Këto dyshime janë bërë shkas edhe për procedimin e presidentit nga Kongresi.

“Kurrë nuk i kam thënë Boltonit se ndihma për Ukrainën ishte e lidhur me hetimet për demokratët. Nëse Boltoni e thotë këtë, e bën vetëm për të shitur librin. Transkriptet e telefonatave të mia me presidentin Zelenski janë të vetmet prova që nevojiten, si edhe fakti që si presidenti edhe ministri i jashtëm i Ukrainës janë shprehur se nuk ka pasur presione,” reagoi presidenti Trump në Twitter.

Senati javën e kaluar hodhi poshtë kërkesën për të thirrur Boltonin për dëshmi.

Demokratët thonë se dëshmia e tij është jetike për një gjykim të drejtë të akuzave kundër presidentit, përndryshe do mendohet se Shtëpia e Bardhë po fsheh një ngjarje kriminale.

Ish-këshilltari i sigurisë u shkarkua shtatorin e kaluar me arsyen e mosmarrëveshjeve për politikat, dhe Trump ka thënë se për qëllime sigurie, ai nuk do që Bolton të dëshmojë në Senat.