E gjitha bota thuajse në izolim, në Wuhan e festojnë ndryshe Vitin e Ri

Teksa miliona vetë në të gjithë botën nuk mundën të festonin siç do të kishin dëshiruar ardhjen e Vitit të Ri 2021, për shkak të pandemisë së koronavirusit, në Wuhan, aty ku gjithçka nisi, duket se bashkë me 2020-n, lamtumira iu dha një herë e mirë edhe Covid-19.

Në fotografitë e publikuara nga Reuters, të cilat me siguri do të ngjallin zilinë e mbarë botës, banorët e qytetit ku koronavirusi u pikas për herë të parë festuan mbërritjen e 2021-shit me muzikë live, e turma të ngjeshura nëpër rrugët e qytetit.

Festa u mbajt 12 muaj pasi koronavirusi futi në izolim total qytetin me 11 milionë banorë, për t’u shfaqur e përhapur më pas në të gjithë globin, duke e bërë vitin 2020, një ndër më të zymtit në historinë e njerëzimit.

Në Wuhan nuk raportohet asnjë rast i ri prej 10 majit, pasi qyteti iu nënshtrua masave izoluese ndër më të rreptat në botë.