Homazhet për 33-vjeçaren Sarah Everard, kritika policisë së Londrës për shpërndarjen e manifestimit

Qytetarë dhe politikanë i kanë kërkuar shpjegime Policisë Metropolitine të Londrës pas aksionit për të shpërndarë me forcë një manifestim ku bëhej thirrje kundër dhunës. Qytetarët i bënë homazhet Sara Everardit, 33-vjeçares së vrarë në fillimin e muajit.

Policia londineze po kritikohet për forcën që përdori në një manifestim paqësor qytetarësh.

Banorë të kryeqytetit britanik u mblodhën të dielën për t’i bërë homazhet 33-vjeçares Sara Everard, pa marrë lejen e autoriteteve.

Policia ndërhyri me pretekstin se duhet të garantonte rendin publik dhe masat antikovid.

Eksponentë të ndryshëm politikë, edhe kryebashkiaku i Londrës, e qortuan aksionin policor pasi disa gra iu nënshtruan arrestimit dhe veprimeve të dhunshme, ndërsa kishin dalë pikërisht me kauzën e mbrojtjes nga dhuna.

Më herët, qindra qytetarë dhe vetë policët ndezën qirinj në kujtim të 33-vjeçares, Sara Everard.

Punonjësja e marketingut u zhduk më 3 mars.

Dyshohet se ajo u rrëmbye dhe u vra gjatë rrugës për në shtëpi.

Dyshohet se krimin e kreu një oficer policie, ndërsa të mërkurën u zbulua edhe trupi i pajetë i 33-vjeçares.