Kriza e emigrantëve – Athina përfshihet nga protestat kundër BE e SHBA

Athina është përfshirë nga protesta, ku qindra mijëra persona dolën në rrugë në shenjë mbështetje dhe solidariteti ndaj emigratëve që ndodhen në vend. Ata ndaluan përballë zyrave të Bashkimit Evropian dhe Ambasadës së Shteteve të Bashkuara të Amerikës, ku kritikuan politikat e tyre të emigracionit dhe i quajtën sindikata të luftës. Në kampet e qeverisë greke aktualisht janë të strehuar mbi 60 mijë emigratë, pjesa më e madhe prej të cilëve kanë aplikuar për azil.

Qindra mijëra persona që përfaqësojnë të majtën në Greqi, kundër razicmit dhe pro paqes protestuan në Athinë në shenjë mbështetje dhe solidariteti ndaj emigratëve që ndodhen në vend, duke kritikuar Bashkimin Evropian për politikat e tij të migracionit.

Ata marshuan në rrugë të ndryshme të kryeqytetit grek, u ndalën përballë zyrave të Bashkimit Evropian dhe Ambasadës së Shteteve të Bashkuara të Amerikës.

Protestuesit janë kundër marrëveshjes së Bashkimit Europian të nënshkruar me Ankaranë për kthimin në Turqi të të gjithë emigrantëve që kapen ilegalisht duke udhëtuar në Egje drejt vendeve europiane.

Duke brohoritur në kor se Bashkimi Europian dhe NATO janë sindikata të luftës, grekët kanë akuzuar unionin dhe NATO-n mbi luftën në Siri, e cila ka shkaktuar edhe fluksin e madh të emigrantëve në Europë. Petros Constantinou, kreu i lëvizjes kundër racizmit, u shpreh:

“Ne shohim refugjatët të bllokuar në ishujt greke dhe në Egje duke pritur për çfarë? Ne gjithashtu shohim se nuk kanë të ardhme as në kampe. Ndaj dhe njerëzit kërkojnë hapjen e kufijve , por Bashkimi Europian bën vetëm premtime dhe asgjë tjetër. Por realiteti është krejt tjetër, sepse luftë në Lindjen e Mesme nuk do të thotë gje tjetër veçse më shumë klandestinë”.

Në kampet e qeverisë greke aktualisht janë të strehuar mbi 60 mijë emigratë, pjesa më e madhe prej të cilëve kanë aplikuar për azil.

Zyrtarë të qeverisë greke thanë se 682 emigrantë janë kthyer në Turqi që pas nënshkrimit të marrëveshjes në muajin mars.

Sipas të dhënave të BE-së, rreth 4455 emigrantë janë zhvendosur nga Greqia që nga viti i kaluar.