Kryeministri i Ukrainës shpall vendimin për dorëheqje

Kryeministri i Ukrainës, Volodymyr Hroysman, ka deklaruar se do të japë dorëheqje. Në një deklaratë televizive, ai tha se do të largohet në takimin e ardhshëm të qeverisë, më 22 maj.

Njoftimi i tij vjen pak orë pasi Volodymyr Zelensky u betua si president i Ukrainës ku më pas tha se do të shpërbejë parlamentin dhe do të mbajë zgjedhje të reja brenda dy muajsh.

Hroysman, i cili është anëtar i bllokut të ish-presidentit Petro Poroshenko, ndër të tjera tha se do të garojë në zgjedhjet e ardhshme parlamentare.

Kujtomë se Hroysman, ka qenë kryeministër që në prill të vitit 2016. Ai ka shërbyer më herët si kryetar i Parlamentit.

Dorëheqja e tij pason ato të dy anëtarëve të tjerë të kabinetit: ministrit të Mbrojtjes, Stepan Poltorak, dhe të shefit të Shërbimit të Sigurisë, Vasyl Hrytsak. Të dy ata dhanë dorëheqje të hënën.