Ndërron jetë Mbreti Zulu, 28 fëmijët e tij janë kandidatë për fronin

Mbreti Goodwill Zwelithini i kombit Zulu në Afrikën e Jugut, është ndarë nga jeta në moshën 72-vjeçare. Sipas raportimeve nga mediat ndërkombëtare ai po kurohej prej një jave në spital, për probleme të shkaktuara nga diabeti.

Ai ishte udhëheqësi i grupit më të madh etnik në Afrikën e Jugut dhe një person me ndikim të madh. Zwelithini ishte pasardhës i drejtpërdrejt i Mbretit Cetshwayo, i cili udhëhoqi kombin Zulu gjatë luftës me Britaninë e Madhe në vitin 1879.

Gjatë sundimit të tij 50-vjeçar, ai luftoi fort për ruajtjen e identitetit kulturor të tribusë së tij. Presidenti i Afrikës së Jugut Cyril Ramaphosa, e vlerësoi si një njeri me vizion. Por shpesh ai është kritikuar për festat e ekzagjeruara dhe komentet e tij të cilësuara homofobike.

Roli i tij ishte kryesisht ceremonial, por gjithsesi ai mbetet një prej monarkëve më të njohur të kontinentit afrikan. Kombi Zulu, me 11 milionë pjesëtarë, përbën 18% të popullsisë së Afrikës së Jugut. Nuk ka ende të dhëna se cili prej 28 fëmijëve (me 6 bashkëshorte) do të trashëgojë fronin, vendim që pritet të merret në vazhdim.