Kosova vijon që të përballet me ngjarje të rënda. Pas vrasjes së Liridonës, një tjetër ngjarje e rëndë ka tronditur thellë shoqërinë. Avokati i familjes së Ermal Fejzullahut që u rrah për vdekje nga dy adoleshentë, Tom Gashi kërkon dënim maksimal për autorët. Ai e cilësoi vrasjen e 18-vjeçarit një krim të rëndë ndaj një personi krejt të pafajshëm. Duke kujtuar vrasjen e planifikuar nga bashkëshorti të Liridona Ademajt, Gashi kërkon ashpërsim të ligjit.
“Nuk kanë kaluar as dy muaj nga rasti trishtues i Liridonës, e planifikuar nga bashkëshorti. Imagjinoni vrasje me pagesë dhe mund të marrë një dënim jo të duhur. Dënimet e dhëna nga gjykatat tona nuk janë fare në proporcion me peshën e veprës penale.
Politika e dënimeve duhet të ndryshojë, nuk duhet ta lëmë dikë që të vrasë disa persona, por në momentin e parë që dikush kryen një vepër kaq të rëndë penale, të jetë mundësia e dënimit kapital. Për vepra të caktuara penale, në SHBA, nëse i kryen tri herë, e ke të garantuar se do të mbetesh përjetësisht në burgje”.
