Kryetarja e Komisionit të Medias, deputetja e PD-së Flutura Açka ka një thirrje publike për ekranet shqiptare, në lidhje me programet e mbrëmjes. Ajo shkruan se programet duhet të qëndrojnë sa më larg krimit, pa shpërndarë shumë informacion për publikun, duke shmangur dhunën e makabritetin. Për të në ekranet shqiptare duhet krijuar një mjedis më njerëzor dhe larg etheve të klikimeve.
“Thirrje publike moderatorëve shqiptarë të programeve të mbrëmjes. Ky shumëfishim i frikshëm i krimit familjar, është “krim” mbi shqiptarë. Këtë të hënë, në pikun e shikueshmërisë së shqiptarëve, në orën 21.00 të mbrëmjes, plot dhjetë programe televizive u morën me detajet (gati makabre) të vrasjes më të fundit të bujshme në familje.
Unë e kuptoj që tregu shqiptar i ekranit është i egër, i falem thellësisht lirisë së medias, por ka një detyrim, në fund të të gjithave, edhe njerëzor: t’u hedhim shqiptarëve nga ekranet tona më pak dhunë e makabritet. Duke dorëzuar nga pak përditë nga ethet e klikimeve dhe shikuesve, ne mund të krijojmë një mjedis më njerëzor.
Ose, së paku, të flasim me të njëjtën ethe siç flasim për politikën dhe krimin, për cilësinë e rrugëve, nivelin é universiteteve, zonat é mbrojtura, Diasporën, muzetë, pyjet, emigrimin, administratën shtetërore, oligarkinë, monopolet, bujqësinë, etj. Është një thirrje shumë miqësore é njerëzore si mikeshë, qytetare, deputete dhe, në fund, si kryetare e Komisionit Parlamentar që mbulon edhe Median Shqiptare”, shkruan Açka.
