Kuvendi ka miratuar ligjin e ri për mbrojtjen e konsumatorit, i cili parashikon për herë të parë kufizimin e interesave të kredive konsumatore që marrin qytetarët. Sipas ligjit që pritet të hyjë në fuqi, Banka e Shqipërisë dhe ministria e Ekonomisë do të hartojnë një udhëzim të përbashkët.
Ky udhëzim synon të mbrojë qytetarët nga abuzimet e mundshme me interesat dhe kostot e këtyre kredive. Lëvizja vjen pas një skeme mashtrimi me kreditë që u zbulua më shumë se dy vite më parë. Ajo preku direkt e indirekt rreth 100 mijë qytetarë, sipas të dhënave të përfshira në ligj.
Dy subjekte të licencuara për mbledhjen e kredive me probleme, MCA dhe FINAL, të cilave bankat u kishin shitur këto kredi, u rritën detyrimet qytetarëve përmes interesave dhe gjobave. Kjo ndodhi mbi rregullat e caktuara nga Banka e Shqipërisë. Pas kësaj skeme, Banka e Shqipërisë kërkoi ndryshime ligjore për të kufizuar me ligj interesat dhe gjobat.
Ligji i miratuar tani përfshin dy nene që rregullojnë këtë boshllëk. Neni 152 i ligjit përcakton se norma maksimale efektive vjetore e interesit e një marrëveshjeje kredie konsumatore do të caktohet me udhëzim të përbashkët midis Bankës së Shqipërisë dhe ministrisë përgjegjëse për mbrojtjen e konsumatorit.
Brenda saj do të përfshihen të gjitha tarifat, komisionet dhe kostot e tjera që lidhen me kredinë. Në pikën 3 të këtij neni theksohet se çdo dispozitë kontraktuale që parashikon një normë efektive maksimale vjetore interesi mbi kufirin e lejuar është absolutisht e pavlefshme. Aktualisht norma maksimale caktohet me rregullore të Bankës së Shqipërisë dhe rishikohet çdo gjashtë muaj.
Ligji i miratuar parashikon gjithashtu ngritjen e Agjencisë Kombëtare për Mbrojtjen e Konsumatorit, organi përgjegjës për të mbrojtur interesat e konsumatorit në treg. Kjo agjenci do të ketë të drejtën të hetojë dhe madje të ndalojë tregtarët të shesin mallra apo të ofrojnë shërbime nëse konstatohen shkelje të të drejtave të konsumatorëve.
Ndërkohë, një tjetër ligj i ri që aktualisht është në proces konsultimi do t’u ndalojë subjekteve që blejnë dhe mbledhin kredi të këqija të vendosin interesa, penalitete, komisione apo tarifa më të larta se ato që parashikoheshin në marrëveshjen fillestare të kredisë. Këto subjekte nuk do të japin as kredi të reja, pasi me skemën e vitit 2024 u konstatua se ato përdorën si metodë për të shlyer borxhin e vjetër edhe marrjen e një kredie të re.
Kjo i çoi qytetarët deri në humbje të banesave të tyre. Ligji i ri synon të mbyllë boshllëkun ligjor që lejoi rritjen e detyrimeve për qytetarët dhe të vendosë kufij të qartë për kostot e kredive konsumatore. Kështu, Banka e Shqipërisë dhe ministria e Ekonomisë bëhen përgjegjëse për përcaktimin e normës maksimale të interesit.