58-vjeçarja Lumturi Patushi humbi jetën pasi u qëllua me thikë në zemër nga bashkëshorti i saj, 69-vjeçari Hysni Patushi. Ngjarja e rëndë ndodhi në banesën e vajzës së tyre, në zonën e “Rrugës Ranorama”, në Tiranë.
Sipas të dhënave të bëra publike, konflikti mes çiftit dyshohet se lidhej me kohën që Lumturia kalonte në shtëpinë e vajzës, ku kujdesej për katër nipërit e saj të mitur. Kjo situatë, sipas informacioneve, nuk ishte pranuar nga bashkëshorti i saj, i cili ishte nisur nga banesa e tyre në “Don Bosko” drejt shtëpisë së vajzës, ku ndodhi edhe krimi.
Vrasja ka ndodhur në prani të fëmijëve, ndërsa mësohet se nuk ishte hera e parë që 69-vjeçari ushtronte dhunë ndaj bashkëshortes. Në vitin 2017, ai ishte arrestuar pasi kishte dhunuar Lumturinë, me të cilën kishte shtatë fëmijë.
Pas ngjarjes, Hysni Patushi ka hedhur thikën jashtë pallatit dhe është larguar në drejtim të Kamzës, ku ka takuar një të afërm. Pas bisedës me të, ai ka vendosur të vetëdorëzohet në polici, ku ka rrëfyer edhe krimin.
Gjatë dëshmisë së tij, Patushi ka pretenduar se alkooli kishte ndikuar në përshkallëzimin e konfliktit. Ndërkohë, arma e krimit është gjetur dhe sekuestruar nga policia, falë pamjeve të kamerave të sigurisë në zonën ku ndodhi ngjarja.