Shtetet e Bashkuara dhe NATO kanë reaguar lidhur me nismën e Qeverisë në detyrë të Kosovës për krijimin e një Xhandarmërie, duke kërkuar që çdo hap në këtë drejtim të jetë në përputhje me angazhimet për ruajtjen e paqes dhe sigurisë në vend dhe rajon.
Një zëdhënës i Ambasadës së SHBA-së në Prishtinë ka deklaruar për Radion Evropa e Lirë se Uashingtoni po ndjek nga afër zhvillimet dhe njoftimet për këtë propozim, duke theksuar rëndësinë që strukturat e reja të sigurisë të mos bien ndesh me zotimet ndërkombëtare të Kosovës. Sipas tij, çdo iniciativë duhet të kontribuojë në stabilitet dhe bashkëpunim rajonal.
Nga ana tjetër, ministri në detyrë i Punëve të Brendshme, Xhelal Sveçla, ka bërë të ditur se janë ndërmarrë hapat e parë për krijimin e kësaj force, e cila sipas tij do të ketë detyra të qarta si mbrojtja e kufijve, ruajtja e integritetit territorial, lufta kundër terrorizmit, menaxhimi i situatave të trazirave dhe mbrojtja e infrastrukturës kritike.
Edhe NATO ka reaguar përmes KFOR-it, duke theksuar se po i vëzhgon nga afër deklaratat dhe zhvillimet rreth kësaj çështjeje. Aleanca ka nënvizuar rëndësinë e vazhdimit të bashkëpunimit mes institucioneve të sigurisë në Kosovë dhe misionit të saj paqeruajtës, me qëllim garantimin e stabilitetit dhe sigurisë për të gjitha komunitetet.
NATO ka kërkuar që çdo veprim i institucioneve të sigurisë në Kosovë të bëhet në koordinim me KFOR-in dhe në funksion të stabilitetit rajonal.
Ndërkohë, përfaqësues të disa vendeve të tjera, përfshirë Gjermaninë, kanë preferuar të mos komentojnë mbi këtë zhvillim. Xhandarmëria si koncept përfaqëson një forcë me karakter të përzier ushtarak dhe policor, e cila në vende të ndryshme kryen detyra të rendit dhe sigurisë publike.