Ministri i Pushtetit Vendor, Ervin Demo ka publikuar videon e protestuesve duke ndaluar një autobus të transportit urban në Tiranë, dhe thotë se viktimat nuk ishin politikanë por qytetarë të zakonshëm, të cilët u përballën me tensione dhe akte dhune. ”Sot u pa edhe një herë se sa larg është narrativa e një proteste të ashtuquajtur “paqësore” nga realiteti. Viktimat e radhës nuk ishin politikanët, por qytetarët e zakonshëm, pasagjerët e transportit urban në Tiranë, të cilët u përballën me bllokime, tension dhe akte dhune”, shkruan Demo.
Postimi i plotë
Sot u pa edhe një herë se sa larg është narrativa e një proteste të ashtuquajtur “paqësore” nga realiteti. Viktimat e radhës nuk ishin politikanët, por qytetarët e zakonshëm, pasagjerët e transportit urban në Tiranë, të cilët u përballën me bllokime, tension dhe akte dhune.
Kur në emër të një kauze pengohet jeta normale e qytetarëve, cënohet liria e tyre e lëvizjes dhe vihet në rrezik rendi publik, maska bie. Kjo nuk është mbrojtje e interesit publik, por imponim përmes kaosit.
Shqipëria ka nevojë për zhvillim, dialog dhe përgjegjësi, jo për dhunë. Politika e dështimit, e zemërimit dhe e përplasjes nuk duhet të lejohet të shfaqë anën e saj më të errët në kurriz të qytetarëve dhe të jetës së tyre të përditshme.